DICTON VICTORIAL
Ce fut icy qu’apparut la vertus
De quatre preux et vaillans champions,
Qui de bon sens, non de harnois vestuz,
Comme Fabie ou les deux Scipions,
Firent six cens soixantes morpions,
Puissans ribaulx, brusler comme une escorce.
Prenez y tous, roys, ducz, rocz et pions,
Enseignement que engin mieulx vault que force ;
Car la victoire,
Comme est notoire,
Ne gist que en heur.
Du consistoire,
Où regne gloire
Le hault Seigneur,
Vient, non au plus fort ou greigneur,
Ains à qui luy plaist, com’ fault croire.
Doncques a chevanche et honneur
Cil qui par foy en luy espoire.
Extrait de "Pantagruel", chapitre XXVII.
François RABELAIS
(1485 - 1553)
Né à La Devinière, près de Chinon, Rabelais fut médecin à Lyon et curé à Meudon. Il est l’auteur de "Pantagruel" et de "Gargantua".
Une rue et une place de Tours portent son nom.
|
|
|
|